Sunday, June 15, 2008

காலடி கவிதை

இன்று திண்ணை.காம் என்னும் வலை பகுதியில் சங்கரர் பிறந்த இடமான காலடி பற்றி படித்தேன். :-) சேதுபதி அருணாச்சலம் மிக அழகாக சங்கரர் பிறந்த இடத்தை பற்றி எழுதி இருந்தார். ஜி.வி. அய்யர் எடுத்த சங்கராச்சாரியார் என்ற படத்தை பார்த்த போது எனக்கு ஏற்பட்ட அனுபவத்தை வார்த்தைகளால் விவரிக்க முடியாது. சங்கரர் நான் பிறந்த மாநிலத்தில் பிறக்க வில்லை, நான் அவரின் மரபையும் பின்பற்றும் அத்வைதி இல்லை.பின் எனக்கு என்ன பிடித்தது?
அவர் பிறப்பிலும், வாழ்கையிலும், கடைசியில் இறப்பிலும் இருந்த ஒரு அழகு. தெய்வங்கள் மண்ணில் பிறந்த போது வாழ்கையை எவ்வளவு அழகாய் வாழலாம், இறப்பை எவ்வளவு அழகாய் எதிர்கொள்ளலாம் என்று காண்பித்திருக்கிறார்கள். :-), ஜி.வீ. அய்யர் ஒரு சிறந்த படைப்பாளி. சங்கரர் என்றாலும் ஒன்றை நினைக்காமல் இருக்க முடியவில்லை படம் பார்க்கும் போது. சங்கரர் பாத்திரத்தில் நடித்த நடிகர் மிகவும் வசீகரமாக இருந்தார். :-)






Thursday, June 12, 2008

தனித்திரு விழித்திரு பசித்திரு-1

வள்ளலாரின் வார்த்தைகள்
என் வாழ்வில் சமீப காலங்களில் நான் புரிந்து கொண்ட வழி முறை. பூட்டிய கதவை திறக்கும் சாவி, இந்த மூன்று விதிகளும் சேர்ந்த ஒரு நிலை. அந்த நிலை த்யானமே.
உண்மையை உணர்ந்த ஒரு ஞானியின் முன் இரண்டு வருடங்கள் முன் நின்றிருந்தேன். த்யானத்தை பற்றிய ஒரு வினாவிற்கு பதில் அளிக்கும் போது, வாழ்வே தியானம் தானே? என்று ஒரு எதிர் கேள்வி கேட்டார். அப்போது புரியவில்லை அவர் சொன்னது. அதன் பின் நான் புரிந்து கொண்டது கீழ் வரும் நான்கு வழிகளே.
எதிர்பார்க்க கூடாது, உள் நிலை - வெளி நிலை சலனம் கூடாது, வயிறு முழுதும் நிரம்பாமல் பசித்திருக்க வேண்டும், ஓய்தல் இன்றி களைத்திருக்க வேண்டும். எங்கேயும், எப்போதும், யாருடனும் இந்த நான்கு வழிமுறைகள் பயன் தரும். இதை நான் புரிந்து கொண்டதற்கு அப்புறம் அந்த ஞானியை நான் பார்க்கவில்லை. காத்திருக்கிறேன் சந்திக்க.

Wednesday, June 11, 2008

சிட்டுகுருவிக்கென்ன கட்டுப்பாடு

இப்படி ஒரு சினிமா பாட்டு உள்ளது
இன்று காலை பல்கலைக்கழகத்திற்கு நடந்து வரும் வழியில்
ட்ட்ட்ட்ர்ர்ர்ர் என்று ஒரு குருவி பறந்து சென்றது
உண்மையை உணர்ந்த ஒரு ஞாநி "பறவைகளை நாம் சுதந்திரத்தின் அடையாளமாய் பார்த்தாலும், அவைகளுக்கும் பிரச்சனைகள் உள்ளது" என்றது
ஞாபகத்திற்கு வந்தது. ஆயினும் சிட்டுக்குருவி ஆனந்தத்தின் வெளிப்பாடாய் தான் எனக்கு படுகிறது. சுதந்திரத்தை விரும்புவோர் பறக்கவே ஆசைபடுவர்.

நிசப்தம்

தனிமை, நிசப்தம், இருட்டு
இந்த மூன்றுமே "ஒன்று" தான்
இந்த மூன்றிலும் "ஒன்றும்" இல்லை

Tuesday, June 10, 2008

காதலை யார் சொல்வது?

சமீபத்தில் என் நண்பன் ஒருவனிடம் பேசிகொண்டிருந்தேன். அப்போது அவன் என்னிடம் கேட்டான், ராஜி காதலை யார் முதலில் சொல்வது என்று?. நான் "இது என்ன கேள்வி, யாருக்கு முதலில் காதல் வருதோ அவர் அல்லது அவள் சொல்லணும் என்று". அவன் பதிலுக்கு "இல்லை பெண்கள் சொன்னால் அவர்களின் மார்க்கெட் நிலவரம் என்னாவது?". எனக்கு தூக்கிவாரி போட்டது. ஓ , இப்படி எல்லாம் கூட நிலவரம் இருக்கா என்று. இப்படி எல்லாம் கூட யாராவது யோசிப்பார்களா? இப்படி சொல்லாமல் போன காதல் எத்தனையோ? ஒரு வேலை மார்க்கெட் நிலவரம் ஏறிக்கொண்டே இருப்பதால் யாரும் கவலைப்படவில்லை போல.

இருட்டு

உன் விழி ஓரத்தில் இருக்கும் அந்த மெல்லிய இருட்டு
எங்கே உன் மலர்சிரிப்பில் மறைந்துவிடுமோ என்று பயமுறுத்தும் உன் புன்சிரிப்பின் ஓரம் உள்ள அந்த நிழல் இருட்டு
விழுந்த என் கை பற்றி தூக்கி நிறுத்தும் பொழுது நம் கைகளுக்கு இடையில் இருக்கும் இருட்டு
உன் பாதங்களில் சரணடையும் நிமிடம் உன் விரல்களுகிடையே உள்ள இருட்டு
உன் நிழலில் கவிழ்ந்திருக்கும் இருட்டு
இந்த இருட்டை நான் விரும்புகிறேன்
எந்த மடையன் சொன்னான் இறைவன் ஒளியை படைத்தான் என்று
படைத்தது இருட்டு ஓன்றே
நாம் தேடும் அத்தனையும் ஒளிந்திருப்பது அந்த இருட்டில் தான்
அந்த இருட்டு வெட்கப்பட்டு ஒளிந்திருக்கும் நேரம் வெளிச்சம் வெட்கமில்லாமல் வந்துவிடுகிறது
அந்த இருட்டை நோக்கி என்னை அழைத்து போ
ஏனெனில் வெளிச்சம் தரும் காட்சிகள் என்னை அலைகளிகின்றன